20. Róžownika

„Jězus wotmołwi: Jeli Mje štó lubuje, budźe moje słowo dźeržeć, a mój Wótc budźe jeho lubować, a přińdźemoj k njemu a budźemoj pola njeho bydlić“ (Jan 14,23).

Přińdźemoj a budźemoj płaćitej za Boha Wótca a Jězusa Chrystusa. Tola njejstaj Wonaj bjez Ducha Swjateho móžnaj. Swjata Trojica je dźě dospołna jednotnosć. Potajkim by so měło tu město duala – přińdźemoj a budźemoj – mnohota – přińdźemy a budźemy – wužić. Jasne, njeje to gramatisce prawje, tola teologisce – haj. W tutym padźe by so měła gramatiska zasada tutej teologiskej podwolić.

DJD