W katólskej Cyrkwi měješe a ma mać sčłowječeneho Syna Božeho přeco wulku wažnosć.
Hinak je to pola protestantow, a to wot sameho spočatka reformacije.
Za Martina Luthera a jeho přiwisnikow bě Marija jeno cyle jednora žona, kotraž porodźi Jězusa Chrystusa.
Tutu tendencu předstaja derje Marijanske wobrazy Lucasa Cranacha Staršeho.
Jedyn z nich je na přikład wobraz Marija z dźěćatkom pod jabłučinu z lěta 1530.
Na nim sedźi Marija pod jabłučinu a dźerži na klinje Jězusdźěćatko.
Jabłučina dopomina cyle wěsće na paradiziski štom a z tym tež na herbski hrěch prěnjeho čłowjeka, z kotrehož přińdźe Jězus Chrystus ludźi wumóžić.
Nadpadne na tutym wobrazu je tež to, zo steji Jězus z chribjetom wobroćeny k swojej maćeri. A wona scyła njehlada ani njepokza někak na njeho.
Scyła hinaša tendenca knježi na katólskich Marijanskich wobrazach.
Tam pokazujetaj najčasćišo Marija a Jězus z ruku jedyn na druheho, štož zwuraznja symbolisce wažnosć Maćerje Božeje.
Pobožnosć k njej je dźě wosobinsce přez jeje Syna ludźom poručena (wusměrjena ruka Jězusa k Mariji), dokelž je wona posrědnica mjez čłowjekom a Synom Božim (wusměrjena ruka Marije k Jězusej).
Něšto tajkeho naspomnjeny wobraz Cranacha nima.
Marija a Jězus hladataj kóždy do swojeho wosobinskeho směra.
DJD