Naličene němske wuprajenja, kiž maja něšto z bibliskimi tekstami činić chcu na sćěhowace wašnje podać:

  1. Die Haare zu Berge – dopomina na bibliski tekst z Knihi Ijob 4,15. Ijob ćerpi a skoržeše mjez druhim takle: Dych zadu mi po wobliču, a włosy mojeho ćěła sprostnychu.
  2. Salzsäule – Bóh zniči Sodomu a Gomoru ze syrikom a wohenjom jich hrěšnosće dla. Lota a jeho swójbu chcyše Bóh wuchować, ale dyrbjachu spěšnje woteńć a nic so za městom wobhladnyć. Jeho žona pak so wobhladny a bu słony stołp (Gen 19,26).
  3. Zum Moloch erklären – poćahuje so na tekst Stareho Zakonja z Knihi Levitikus 18,21: Njedaj žane swoje dźěćo we wohenju Molochej. Njewonječesć tak mjeno swojeho Boha. Ja sym Jahwe. Přibohu Molochej woprowachu pohanjo často samo swoje dźěći.
  4. Dem schnöden Mammon huldigen – pola sćenika Mateja čitamy: Nichtó njemóže dwěmaj knjezomaj słužić: Bohu a mamonej, to rěka pjenjezam (6,24).
  5. Dorn im Auge – w Starym Zakonju po wućahu z Egyptowskeje poruči Bóh Israelitam Kananjenjow wuhnać a nic so z nimi zwjazać. Hewak bychu ći, kiž njebuchu zabići, Israelitam kałać we wočach być móhli. Tak chcyše Bóh zadźěwać, zo Israelića so přiboham přiwobroća.
  6. Mit Krethi und Plethi durch den Verkehr drängeln – měnjene su tule Kretojo a Filisća, kiž běchu jako wukrajni wojacy dźěl Dawidoweje ćělneje straže pod nawodom Benaja a su naspomnjene w 2. Knize Samuela.
  7. Ein Licht aufgehen – móhło swoje korjenje w bibliskim Psalmje 37,6 měć: Kaž swětło wujewi so twoja sprawnosć a twoje prawo kaž swětło připołdnju.
  8. Gegen den Strom schwimmen – Wšitko pruwujće, dobre zdźeržće. Štožkuli so zda złe, to wostajće (1 Tes 5,21). Abo 1 Jan 4,1: Kóždemu duchej njewěrće, ale pruwujće duchow, hač su z Boha. Abo Gal 1,8: A jeli bychmy my abo jandźel z njebjes wam hinaši ewangelij připowědał hač tón, kiž sym wam wozjewił, tón budź poklaty.
  9. Gewissensbisse – Gen 3,8: Jako je čłowjek hrěšił schowa so před Bohom.
  10. Perlen vor die Säue werfen – Mt 7,6: Njedawajće psam to, štoz je swjate, a njemjetajće swoje parle swinjom, zo bychu je njepoteptali ze swojimi nohami a so wobroćiwši was njeroztorhali!
  11. Wer andern eine Grube gräbt, fällt selbst hinein – Psalm 7,16: Ryje a kopa jamu, ale padnje do njeje, kotruž je sam wurył.
  12. Bleibe im Land und nähre dich redlich – Psalm 37,27: Złeho so pas a čin dobro, zo by přeco na zemi bydlił. Psalm 40,9: Twoju wolu činić, mój Božo, je moja radosć, a twój zakoń je zaryty mojej wutrobje.

S. Chrystamarija