Přinošk k zrozumjenju zmysła šesteje próstwy Wótčenaša

Wot Hodownika 2017 je šesta próstwa Wótčenaša w srjedźišću diskusije wšelakorych medijow. K tomu wupraji swoje stejnišćo tež předsyda Němskeje biskopskeje konferency Kardinal Reinhard Marx. Po jeho měnjenju ma tekst tuteje próstwy zwostać tajki kajkiž wón je, jeno by so dyrbjało jón lěpje interpretować (Tag des Herrn čo. 51/52, 2017, Seite 1).

To je cyle mudra wotmołwa. Tuž ma so spytać po njej jednać. K zmysłu tuteje próstwy bu hižo jedyn tekst na stronje SPDE wěnowany. Z tutym nastawkom so z tym pokročuje.

Swjate Pismo so wukładuje na wšelakore wašnje a při tym so wužiwaja wěste principy. Jedyn z nich twjerdźi, zo maja so při interpretowanju jedneho bisliskeho teksta druhe pasaže Swjateho Pisma wobkedźbować.

Za zrozumjenje zmysła šesteje próstwy Wótčenaša by so sćěhowacy tekst hodźał: „Wo dwoje će prošu, njezapowěz mi to, prjedy hač wumru: ... Chudobu a bohatstwo mi njedawaj! Daj, zo bych měł jěsć sej zasłuženy chlěb! Hewak bych snano přesyćeny tebje zaprěł a prajił: Štó je Knjez? Abo bych wochudnywši kradnył a so přehrěšił na mjenu swojeho Boha“ (Při 30,7-9).

W tutym teksće so modli wěriwy a prosy Boha, tak rjec, zo je jeho žiwjenje přeco jeno ze złotej srjedźiznu woznamjenjene a zo njenastanu ekstremne situacije kaž na přikład chudoba a bohatstwo, dokelž zamóžetej wonej čłowjekej přiležnosć k spytowanju być. Jako bohaty by móhł zabyć scyła na Boha a jako chudy by móhł jeho kaznje łamać.

Wo něšto podobneho dźe mjenujcy w šestej próstwje Wótčenaša. Wěriwy čłowjek prošo, zo njeby Bóh jeho do spytowanja wjedł, chce poprawom před wšelakimi ekstremnymi padami zachowany być, dokelž sej njeje wěsty swojeje swěry napřećo Bohu a jeho kaznjam.

DJD