Wo swjatosć wěry so starać

Pismawučeni, kiž běchu z Jerusalema přišli, rjeknychu: Wón ma Beelcebuba a z wjerchom djabołow wuhanja diabliska (Mk 3, 22).

Na prěni pohlad wupadaja pismawučni w tutej situaciji cyle negatiwnje, dokelž prajo – Jězus ma Beelcebuba – twjerdźachu, zo bu wón wot złeho ducha wobsydnjeny. Tola tutón negatiwny wid na pismawučenych so hnydom změni, hdyž na někotre historiske fakty myslimy.

Dźe mjenujcy wo to, štož čitamy w někotrych njebibliskich žórłach wo Jězusowym času. Tute žórła powědaja, zo běše w tehdomnišim času wjele tajkich ludźi, kotřiž wuhonjachu djabliska. Někotři wědomostnicy samo praja, zo bě tehdom powołanje eksorcista tak rozšěrjene, kaž na přikład powołanje ćěsle abo twarca. Wězo je to wěste přehnawanje, kiž chce jenož pokazać, kajka wulka ličba eksercistow tehdy eksistowaše.

Tute žórła njepowědaja pak jenož wo mnohosći wuhonjacych złych duchow. Wone zwobraznja tež někotru techniku, kotruž wužiwachu tući ludźo při wuhonjenju djabliskow. Jedyn z nich na přikład trjebaše za to wěste amulety, z kotrychž pomocu „ćehnješe“ wón djaboła přez nós wobsydnjeneho. Jedyn druhi pak njetrjebaše scyła pomocne srědki k tomu. Wón prašeše so jenož za mjenom djabliska a wuhoni jeho.

Zajimawe je tež to, zo běchu pola tak mjenowanych Essenow, kotřiž bydlachu w času Jězusa Chrystusa w bliskosći Mortweho morja, wěste wučbnicy, wopisowace wšelakore techniki za wućěrjenje złych duchow.

Hinak prajene, Jězus Chrystus njebě jenički eksorcist, kiž wuhonješe djabliska: Jeli ja wuhonjam djabliska z pomocu Beelcebuba, z čejej pomocu wuhonjeju jich potom waši synojo? (Mt 12, 27). Tohodla pismawučeni, to wědźo, spytachu jeho kritizować a takle ze wšitkimi druhimi eksorcistami přirunać. Hłowny zasměr tuteho počinanja pak běše zakitowanje praweje wěry.

Wězo, to prajo, scyła nochcu tutych pismawučenych dospołnje wusprawnić, tola dopominajo na tutón historiski pozadk, chcu pokazać, zo njeběchu pismawučeni w cyle jednorej situaciji. Wulka ličba pućowacych eksorcistow pohnuwaše jich, jako zakitowarjow woprawdźiteje wěry, na to reagować. Wosoba Jězusa njebě za nich w tutym padźe žane wuwzaće.

Ta podawizna je tež powučaca za nas. My mamy so tohorunja wo swjatosć našeje wěry starać, tola bjez ponižowanja druheho.

DJD