Hody a chlěb

Jězus Chrystus, kaž to steji w Swjatym Pismje, je so w Betlehemje narodźił (Mt 2,1; Lk 2,4-7). Betlehem to je hebrejske mjeno, kiž rěka dom chlěba.

Jězus Chrystus mjenowaše sebje z wšelakorymi titlemi, kaž na přikład Syn čłowjeka (Mk 8,31), Dobry pastyr (Jan 10,11), Winowy pjeńk (Jan 15,1), ale tež rěčeše wón wo sebi jako wo Chlěbje žiwjenja (Jan 6,51).

To by potom rěkało, zo je so Jězus – Chlěb žiwjenja w měsće chlěba narodźił.

Ale nic jeno to.

Zaso wěmy ze Swjateho Pisma, zo bu narodźene Jězusdźěćatko do žłobika połožene (Lk 2,7). Tola tule wužite grjekske słowo fatne njerěka jenož žłobik. Tute słowo ma tež hišće druhe woznamy kaž na přikład korto, ale tež kašćik.

Tehdom bě z wašnjom pućujo jedyn kašćik sobu brać. Wón wisaše na zwěrjeću a měješe dwaj dźělej. W jednym dźěle ležachu wšelakore při pućowanju trěbne wěcy a w druhim ležachu za puć trěbne produkty.

Mjez eksegetami eksistuje tajke měnjenje, zo narodźene Jězusdźěćatko bu mjenujcy do tuteho druheho dźěla putniskeho kašćika połožene.

W tajkim padźe by to rěkało, zo Chlěb žiwjenja njeje so jenož w měsće chlěba, ale tež na městnje postajenym za chlěb narodźił.

DJD