Štóz je w Betlehemje w Swjatym kraju pobył, tón je cyle wěsće tež ródnu Baziliku Jězusa Chrystusa a w njej ležacu prózdnjencu jeho naroda wopytał. Wón je so snano tohorunja samo z ruku tuteho městna dótknył. Na to pokaza tam połožena hwězda. Wona dopomina na tak mjenowanu hwězdu Třoch Mudrych, kiž dowjedźe jich jónu k Jězusdźěćatkej (Mt 2,1-12).

Nic pak jenož.

Ta hwězda ma tež hišće dalši symboliski woznam, mjenujcy pokaza wona na Dawidowy pochad Jězusa Chrystusa. Na to poćahuja so pruhi tuteje hwězdy abo dokładnišo prajo jich ličba. Jich suma wučini 14. A 14 to je ličba mjena Dawida. Hebrejsce pisa so wono jeno z 3 pismikami: DWD. D liči 4, W liči 6 a hišće raz D ma zaso 4. Tuž 4 + 6 + 4 = 14.

Tuteje přičiny dla naspomni so w rodopisu Jězusa Chrystusa, zo běše wot Abraham do Dawida a wot Dawida do přesydlenja do Babylona kaž tež wot Babylonskeho přesydlenja hač ke Chrystusej 14 generacijow (Mt 1,17).

DJD