Tekst ewangelija z mumije

Dnja 22. januara 2015 wozjewi Radio Vatican w swojim pólskim wudaću powěsć wo starym papyrusu, kotryž bu před někak třomi lětami w mumiji namakany. Po jeho přepytowanju ze wšelakorymi metodami přińdźechu wědomostnicy k sćěhowacymaj wuslědkomaj:

  • Staroba papyrusa saha něhdźe hač do wosmeho dźesatka prěnjeho lětstotka nešeho  ličenja časa.
  • To je fragment Ewangelija po Marku

Jelizo stej tutej wuslědkaj wěrnej, potom by to był – znajmjeńša bu tak wozjewjene – najstarši dźeńsa nam znaty fragment Noweho Zakonja, dokež mějachu dotal wědomostnicy za najstarši tak mjenowany Papyrus Rylandsa (P52), kiž pochadźa někak z połojcy druheho lětstotka a wobsahuje mały wotrězk Ewangelija po Janu, mjenujcy 18,31-33.37-38 (foto 1).   

Na prěni pohlad je to radosćiwa powěsć. Dźeń a bóle přibližamy so k originalam Noweho Testamenta. Za mnje wosobinsce pak pobrachowaštej w tutej informaciji vatikanskeho rozhłosa znajmjeńša dwě wěcy: Dokładnosć, wo kotry tekst Ewangelija po Marku tule dźe, kaž tež naspomnjenje, zo eksistuje hišće dalši mały fragment Ewangelija po Marku 7Q5 (6,52-53), kotryž, kaž praja wědomostnicy (na př. sławny José O'Callaghan SJ), pochadźa něhdźe z połojcy prěnjeho lětstotka a bu w lěće 1952 mjez Qumranskimi rukopisami nańdźeny (foto 2). Z druhimi słowami, na tutym polu maja wědomostnicy hišće tójšto wuslědźić… 

DJD