Powostanki Betsaidy-Julias

Nowy Zakoń mjenuje wjele wšelakorych městnow  zwjazanych ze žiwjenjom Jězusa Chrystusa a jeho japoštołow.

Jedne z nich je Betsaida.

Štóž pohlada do jedneho wědomostneho bibliskeho leksikona, tutón nadeńdźe w nim někak sćěhowacu informaciju.

Tam so naspomni, zo bě Betsaida w Jězusowym času jedna mała wjeska; zo pochadźachu z njeje japoštoljo Pětr, Handrij a Filip (Jan 1,44; 12,21); zo nasyći Jězus w jeje bliskosći 5 tysacow ludźi (Mk 6,45) a wuhoji jedneho slepeho muža (Mk 8,22); zo buchu jeje wobydlerjo wot Jězusa za pobrachowace nakazanje porokowane (Mt 11,21).

Tam so naspomni tohorunja cyle wěsće, zo bu Betsaida wokoło 2. lěta před Chrystusom wot Herodesa Filipa, syna Herodesa Wulkeho, přetwarjena a do statusa města pozběhnjena.

Betsaida dósta tež přimjeno Julias a to k česći dźowki prěnjeho kejžora Oktawiana Augusta.

Tak sta so Betsaida-Julias z rezidencu Herodesa Filipa, kaž tež z městnom jeho smjerće.

Po tajkim krótkim zestajenju najwažnišich bibliskich a historiskich faktow přidadźa normalnje słowniki tež to, zo njeje lokalizacija tuteho městna znata.

Dźensa je so Bohu dźak ta situacija změniła.

Před krótkim je so w medijach wozjewiło, zo su israelscy archeologojo powostanki Betsaidy-Julias namakali. 

Wone su dwaj metraj pod zemju w bliskosći městna, hdźež rěka Jordan so do Galilejskeho morja wuliwa.

Mjez tam namakanymi powostankami by so móhli na přikład ruiny romskeje kupjele, kaž tež moneta z wobrazom kejžora Nerona mjenować.

Wjace hlej orygenes.pl a beholdisraelnews.wordpress.com.

DJD