Wy sće tu: Biblija a ... / Liturgija / LL B 2017/18 / Přezlětny čas / 24. přezlětna njedźela (DJD)

Pomoc Božeho słowa w přećiwnosćach

W dźensnišim prěnim čitanju smy jedyn krótki fragment z Knihi Jezaja słyšeli (50,5-9a). Tutón tekst pochadźa z tak mjenowaneje třećeje pěsnje wo Božim wotročku. Cyłkownje znajemy štyri tajke pěsnje. W nich so powěda wo wosudźe wěsteho Božeho wotročka.

To bě jedna anonymna wosoba, kotraž běše w šěstym lětstotku do Chrystusa w Babyloniskej žiwa. Za Wuzwoleny lud bě to scyła zrudny čas. Woni su wójnu přećiwo babyloniskemu kralej přěhrali. Jerusalemski templ bu zničeny a elita luda dyrbješe do babyloniskeho wuhnanstwa. Mjez nimi běše tež tutón anonymny Boži wotročk, abo samo skupina Božich wotročkow, dokelž w jednej z tutych štyrjoch pěsnjow z mjenom Božeho wotročka njemjenuje so jenož jedna wosoba, ale cyła skupina.

Štó tónle wotročk abo kajka skupina to bě, dźensa dokładnje njewěmy. Jenož jedna wěc je wěsta. Žiwjenje tuteho wotročka abo tuteje skupiny w babyloniskim wuhnanstwje njebě lochke. A přičina toho njewobsteješe jenož w babyloniskim ludźe. Wón, bychmy móhli rjec, poměrnje derje wuhnancow Wuzwoleneho ludu přiwza, zasydli jich koło hłowneho města a dowoli jim swoje wobchody załožić a je wjesć. Přez archeologow namakane dokumenty wobswědča tutón wid. Tam so na přikład rěči wo tym, zo su někotři wuhnancy jako bankierojo skutkowali. Na kóždy pad, jako so Židam někak pjećdźesać lět pozdźišo nawrót do domizny dowoli, je jedyn poměrnje wulki dźěl ludu w Babyloniskej zwostał.

Kajka bě potom přičina ćerpjenjow anonymneho wotročka Božeho abo skupiny wotročkow Božich? Snadź budźe to cyle spodźiwnje klinčeć, ale wotmołwjejo na tute prašenje, dyrbi so rjec, zo pochadźachu tute ćerpjenja wot někotrych čłonow Wuzwoleneho ludu. A dźěše tule wo sćěhowace.

Přehrata wójna pohnu Wuzwoleny lud babyloniskich přibohow připóznać. Někotři pak rozsudźichu so, při wěrje do Boha Jahwe zwostać. A runje tuteje přičiny dla buchu woni na wšelakore wašnje poniženi. A tute poniženje njebě jenož psychiske, ale tež fyziske. Tohodla smy w prěnim čitanju sćěhowace słowa słyšeli: Bijacym sym poskićił swój chribjet, swojej licy tym, kotřiž mi brodu wutorhachu. Swoje wobličo njejsym zakrywał před hanjenjom a pluwanjom (Jez 50,6).

Tule so naliča wšelakore městna čłowjeskeho ćěła, na kotychž bu wotročk Boži zranjeny, a to chribjet, wobličo a broda. To wšitko pokazuje, zo bu wón wot swojich přećiwnikow wobdaty, a ze wšitkich stronow bity. A njebě to prěni bibliski pad, zo bu něchtó wot swojich krajanow, přiwuznych a přećelow čwělowany. Swjate Pismo znaje wjacore tajke přikłady. Prěni z nich je podawizna dweju bratrow: Kaina a Abela.

Tajke přikłady znajemy tež ze stawiznow. Pólski kral Bolesław Chrobły (967–1025) wojowaše přećiwo Łužičanam a Łužičenjo podpěrachu křižnych ryćerjow w jich wojowanju přećiwo druhim słowjanam. Wosebje ćežke běchu komunistiske časy w Sowjetskim Zwjazku. Tamle přeradźichu, druhdy jenož karjery dla, dźěći swojeju staršeju, a staršej – dźěći. Tež naše časy njejsu žane wuwzaće. Druhdy so to stanje, zo poskaja młodostni bóle na „hłós hasy“ hač na pokiwy staršeju.

Kak mamy so potajkim w tajkich situacijach, połnych napjatosćow, zadźeržeć? Dźensniše čitanje poskića za to jedyn wěsty recept. Wotročk Boži wutra we wšitkich pěćiwnosćach, nic pak swojeje kmanosće dla. Z jeho pomocu bě Jahwe, Bóh tón Knjez: Wšehomócny Knjez bě mi pomocnik, tuž wućeknych ja hańbje (Jez 50,7). Na kajke wašnje je so to stało? Bibliski tekst dawa tež na to wotmołwu. Boži wotročk praji: Wšehomócny Knjez je mi wucho wotewrěł. Ja pak njejsym so spjećował a nazad cofał (Jez 50,5).

Hinak prajene: Boži wotročk wutra we wšitkich tutych dračowanjach jenož z pomocu Božeho słowa, na kotrež wón rady a wěriwje słuchaše. W našim žiwjenju, lubi wěriwi, njech je to podobne. We wšitkich nuzach našeje wšědnosće złožujmy so na teksty Swjateho Pisma, čitajmy je a přemyslujmy. A to zamóže nam starosće přewinyć abo znajmjeńša w nich wutrać, wosebje w padach wěstych konfliktow z přiwuznymi a krajanami.

DJD

© D. Dzikiewicz, M. Nawka, D. Matik 2018 | Datenschutzerklärung