Wy sće tu: Biblija a ... / Liturgija / LL A 2016/17 / Póstny čas / 1. njedźela Póstneho časa (DJD)

Srategija jednanja satana

Lubi připosłucharjo, w dźensnišim ewangeliju smy wo spytowanju Jězusa Chrystusa słyšeli, tuž bych chcył k tutej temje něšto wjace wam zdźělić.

Sprěnja: Kóždy z nas ma we swojim žiwjenju wšelakore spytowanja, dokelž – kaž to pisa swjaty Pětr we swojim lisće – je satan kaž rujacy law, kotryž chodźi wokoło a hlada koho by póžrěł (1 Pětr 5,8). Wosebje pak je satan čłowjekej blizko, hdyž je čłowjek słaby.

W žiwjenju Jězusa Chrystusa bě podobnje. Satan spytowaše jeho, jako bě čas posćenja w pusćinje ke kóncej a Jězus bě hłódny (Mt 4,2).

To je strategija satana. Wón so bliži čłowjekej, hdyž je tón ze wšelakorych přičinow wosłabjeny a njemóže so dospołnje spytowanju wobarać.

W našim žiwjewnju je to podobne. Satan spytuje nas runje potom, hdyž mamy wšelakore problemy: Strowotne, powołanske, financielne atd.   

Zdruha: Tola strategija satana njewobsteji jenož w tym. Jeho strategija ma tež hišće dalšu wosebitosć. Satan poskića čłowjekej přećiwo postajenemu Božemu porjadej jednać.

Cyle jednory přikład pochadźacy z dźensnišeho ewangelija. Kaž smy słyšeli namjetowaše satan Jězusej Chrystusej kamjenje na chlěb přeměnić (Mt 4,3). Normalnje njeje něšto tajkeho w našim žiwjenju móžne a z wašnjom. Zo bychmy chlěb k jědźi dóstali, dyrbimy dźěłać a najhusćišo cyle ćežko a sprócniwje. Wšak je tajki Boži porjad. Wón je dźě po herbskim hrěchu čłowjekej rjekł: Sprócniwje budźeš so ze zemje žiwić wšitke swoje dny žiwjenja a w płoće swojeho wobliča budźeš jěsć swój chlěb (Gen 3,18-19).

Njehladajo pak na to maja čłowjeske stawizny wjele tajkich přikładow, hdyž čłowjek spyta bjez dźěła sej chlěb wobstarać, a to rubjo, wobšudźejo a samo wužiwajo namóc, wosebje we wójnskim času. To wšitko pochadźa wot satana, kiž na tajke wašnje poskića čłowjekej postajeny Boži porjad złamać.

Podobnu mysl so nadeńdźe tohorunja w poslednjej knize Noweho Zakonja, tak mjenowanej Apokalypsje swjateho Jana, hdźež so čita, zo mjeta satan hwězdy z njebja na zemju (Apk 12,4). A hwězdy, kaž wěmy, maja wot Boha postajene městno, by so móhło rjec, tam štož my jako kosmos mjenujemy.

Ztřeća: Strategija satana ma pak hišće dalši aspekt. Satan njeposkići jeno Boži porjad na zemi změnić. Wón stara so tež wo to, zo by wozjewjeny wobraz Boha změnjeny był.

To by so móhło ze sćěhowacym přikładom zwobraznić. W Knize Genezis so pisa wo jednej rozmołwje. To běše dialog mjez prěnjej žonu a hadom. Na spočatku tuteje rozmołwy so wopraša had pola žony: Je Bóh woprawdźe prajił, zo so njesmě ze wšěch štomow zahrody jěsć (Gen 3,1).

To běše wočiwidna łža. Prěni čłowjek smědźeše dźě ze wšitkich štomow paradiza płody wužiwać, zakazany běchu jeno płody štoma spóznaća dobreho a złeho (Gen 2,17). Tola přez tute prašenje – hač su płody wšitkich štomow zakazane – chcyše satan wobraz dobreho Boha zaćěmnić.

Prašenje satana měješe pěnjemu čłowjekej pokazać, zo njeje Bóh tón Knjez cyle dobry a jeho kaznje wobmjezuja žiwjenje čłowjeka. Bohužel je so to prastaremu hadej poradźiło. Čłowjek započa woprawdźe na Božej dobroće a přichilnosće dwělować. A kak je to w našim žiwjenju?

DJD

© D. Dzikiewicz, M. Nawka, D. Matik 2019 | Datenschutzerklärung