22. Jutrownika

„Hdyž Jězus prěni dźeń po soboće rano z mortwych stany, zjewi so najprjedy Mari Madlenje, z kotrejež bě sydom djabliskow wuhnał“ (Mk 16,9).

Dźensniši ewangelij so započina wot linki, kotraž so připisuje sćenikej Markej, tola njebu wot njeho napisana. W njej so rěči wo prěnim zjewjenju zmortwychstanjeneho Jězusa Chrystusa. Wono bu na Marju Madlenu wusměrjene. To poprawom njeje cyle přezjedne ze starodawnej křesćanskej tradiciju, kiž praji, zo bě z prěnim adresatom zmortwychstanjeneho Jězusa jeho Mać. Kak to bě we woprawdźitosći, to zhonimy jenož w žiwjenju po žiwjenju. W žiwjenju před žiwjenjom njeje wšitko cyle jasne a wočiwidne, dokelž je to hišće čas wěry.

DJD